بَكّْير بكّير
نلَمْلِمْ بَعضنا ونخاف نتأخّرْ
نُهْشل بكرم بِحواكيرْ
الطرقات كلّها لِنا ملعبْ
نركض وما نتعبْ

نلَمْلِمْ بَعضنا ونخاف نتأخّرْ
نمشي متل طابور من عسكرْ
نِتْلَوْلأ بشحّاد معتّر مشحّرْ
نلتقي بختيار حَوْلو نوقف ونتجمهرْ

ألعابنا من حلا دَيْنَا…من فِكر عَينينا
شريطة وعَ راسها كَرْكَرْ
وقوس نِشّاب من غصن يابس مكسّرْ
مُغَيّطتو مِنْ دِكِّة الشِنتان
ْمرقّع خمس ستّ الوان ومخَصْوَرْ

وعَ دروب ضيعتنا نقصد البيدرْ
مكدّس سنابل قمح ومزنّرْ
ومورج يدور ويدورْ
عَ طَلعه عليه نتحسّرْ

ونرجعْ … شعرنا منكوشْ ومغبّرْ
نمرّ عَ تنّورْ… ريحة الخبز بخّور
صَبّيّة تلَوْلِح بكَاره
وحدّا ترقّ العجين خِتياره
رغيف فوق رغيف مقمّر محمّرْ
ما أطيبك يا بَعْبُول من سكّرْ
يا مين يا دِني … يردّني:
صبي أزعرْ
*****